Road News

ਬਿਪਾਸ਼ਾ ਬਸੁ ਨੇ ਇਕ ਵਾਰ ਫਿਰ ਗਲੈਮਰਸ ਕਿਰਦਾਰਾਂ ‘ਤੇ

editor — Mon, 20 Feb 2012 10:16:00 +0000

ਬਿਪਾਸ਼ਾ ਬਸੁ ਨੇ ਇਕ ਵਾਰ ਫਿਰ ਗਲੈਮਰਸ ਕਿਰਦਾਰਾਂ ‘ਤੇ ਧਿਆਨ ਦੇਣਾ ਸ਼ੁਰੂ ਕਰ ਦਿੱਤਾ ਹੈ। ਇਸ ਫ਼ਿਲਮ ‘ਚ ਉਸ ਦੇ ਨਾਂ ‘ਤੇ ਹੀ ਇਕ ਗੀਤ ਦਾ ਮੁਖੜਾ ਲਿਖਿਆ ਗਿਆ ਹੈ, ਜਿਸ ਦੇ ਬੋਲ ਹਨ ‘ਮੈਂ ਬਿਪਾਸ਼ਾ, ਸਿਖਾ ਦੂੰ ਪਿਆਰ ਕੀ ਭਾਸ਼ਾ’। ਆਸ ਕੀਤੀ ਜਾ ਰਹੀ ਹੈ ਕਿ ਇਸ ਫ਼ਿਲਮ ‘ਚ ਲੀਕ ਤੋਂ ਹੱਟ ਕੀ ਕੁਝ ਦੇਖਣ ਨੂੰ ਮਿਲੇਗਾ। ਇਸ ਫ਼ਿਲਮ ‘ਚ ਬਿਪਾਸ਼ਾ ਬਸੁ ਅਤੇ ਮਾਧਵਨ ਨੇ ਲੀਡ ਰੋਲ ਕੀਤੇ ਹਨ। ਇੰਝ ਕਿਹਾ ਜਾ ਰਿਹੈ ਕਿ ਬਿਪਾਸ਼ਾ ਨੇ ਮਾਧਵਨ ਦੀ ਸਿਫਾਰਿਸ਼ ਇਸ ਫ਼ਿਲਮ ਲਈ ਕੀਤੀ ਸੀ।
ਅੱਜਕਲ ਸਿਨੇਮਾ ‘ਚ ਤਬਦੀਲੀਆਂ ਦਾ ਦੌਰ ਚੱਲ ਰਿਹੈ। ਸਿਤਾਰਿਆਂ ਨਾਲ ਸਜੇ ਰਵਾਇਤੀ ਸਿਨੇਮਾ ਤੋਂ ਫ਼ਿਲਮਕਾਰ ਬਾਹਰ ਆ ਚੁੱਕੇ ਹਨ। ਜਿਨ੍ਹਾਂ ਦੇ ਸਿਰ ਤਬਦੀਲੀ ਦਾ ਸਿਹਰਾ ਬੰਨ੍ਹਿਆ ਜਾ ਸਕਦੈ, ਉਹ ਹਨ ਜੋਇਆ ਅਖ਼ਤਰ, ਇਮਤਿਆਜ਼ ਅਲੀ, ਮਿਲਨ ਲੂਥਰੀਆ ਅਤੇ ਅਸ਼ਵਿਨੀ ਚੌਧਰੀ ਵਰਗੇ ਨਵੇਂ ਨਿਰਦੇਸ਼ਕਾਂ ਦਾ ਬੈਚ, ਜੋ ਕੁਝ ਨਵਾਂ ਕਰਨਾ ਚਾਹੁੰਦਾ ਹੈ।
‘ਲਾਡੋ’, ‘ਧੂਪ’ ਅਤੇ ‘ਸਿਸਕੀਆਂ’ ਵਰਗੀਆਂ ਫ਼ਿਲਮਾਂ ਬਣਾਉਣ ਪਿੱਛੋਂ ਅਸ਼ਵਿਨੀ ਚੌਧਰੀ ਨੇ ਸਿਨੇਮਾ ਦੀ ਧਾਰਾ ਨੂੰ ਹੀ ਬਦਲ ਦਿੱਤਾ। ਉਸ ਨੂੰ ਸਿਤਾਰਿਆਂ ਦੀ ਬਜਾਏ ਆਰ. ਮਾਧਵਨ ਹੀ ਠੀਕ ਲੱਗਦੈ ਕਿਉਂਕਿ ਉਹ ਕਿਰਦਾਰ ਦਾ ਚਿਹਰਾ ਦੇਖ ਰਿਹਾ ਹੈ। ‘ਤਨੁ ਵੈਡਸ ਮਨੁ’ ‘ਚ ਕੰਗਨਾ ਨਾਲ ਖੂਬਸੂਰਤ ਜੋੜੀ ਬਣਾਉਣ ਪਿੱਛੋਂ ਉਹ ਪਹਿਲੀ ਵਾਰ ਬਿਪਾਸ਼ਾ ਨਾਲ ਆ ਰਿਹਾ ਹੈ।Œਇਸ ਜੋੜੀ ਤੋਂ ਇਲਾਵਾ ਫ਼ਿਲਮ ਦਾ ਦੂਜਾ ਆਕਰਸ਼ਣ ਬੀਤੇ ਜ਼ਮਾਨੇ ਦੀ ਲੋਕਪ੍ਰਿਯ ਡਾਂਸਰ ਹੈਲੇਨ ਹੈ, ਜੋ ਇਸ ਫ਼ਿਲਮ ‘ਚ ਆਪਣੀ ਖਾਸ ਮੌਜੂਦਗੀ ਦਰਜ ਕਰਵਾਏਗੀ।
ਇਸ ਫ਼ਿਲਮ ਦੀ ਕਹਾਣੀ ‘ਚ ਸਿਡ (ਆਰ. ਮਾਧਵਨ) ਦੀ ਸੈਂਸ ਆਫ ਹਿਊਮਰ ਦੇ ਸਾਰੇ ਮੁਰੀਦ ਹਨ। ਉਸ ਦਾ ਦਿਮਾਗ ਚਾਚਾ ਚੌਧਰੀ ਤੋਂ ਵੀ ਤੇਜ਼ ਚਲਦਾ ਹੈ। ਉਸ ਨੂੰ ਬ੍ਰੇਕਅੱਪ ਮਾਹਿਰ ਕਿਹਾ ਜਾਂਦਾ ਹੈ। ਉਹ ਉਨ੍ਹਾਂ ਲੋਕਾਂ ਦੀ ਮਦਦ ਕਰਦਾ ਹੈ, ਜਿਨ੍ਹਾਂ ਨੂੰ ਪਿਆਰ ‘ਚ ਪੈਣ ਪਿੱਛੋਂ ਜਾਂ ਵਿਆਹ ਪਿੱਛੋਂ ਪਤਾ ਲੱਗਦੈ ਕਿ ਉਹ ਗਲਤ ਇਨਸਾਨ ਨਾਲ ਫਸ ਗਏ ਹਨ। ਗਾਰੰਟੀ ਨਾਲ ਸਿਡ ਅਜਿਹੇ ਲੋਕਾਂ ਨੂੰ ਇਨ੍ਹਾਂ ਰਿਸ਼ਤਿਆਂ ਤੋਂ ਆਜ਼ਾਦੀ ਦਿਵਾਉਂਦਾ ਹੈ।
ਦਿਮਾਗ ਦੇ ਮਾਮਲੇ ‘ਚ ਸੋਨਾਲੀ (ਬਿਪਾਸ਼ਾ ਬਸੁ) ਵੀ ਘੱਟ ਨਹੀਂ ਹੈ। ਪਰੀ ਕਥਾਵਾਂ ‘ਤੇ ਯਕੀਨ ਕਰਨ ਵਾਲੀ ਸੋਨਾਲੀ ਨੂੰ ਉਹ ਕਹਾਣੀਆਂ ਪਸੰਦ ਹਨ, ਜਿਨ੍ਹਾਂ ‘ਚ ਹੈਪੀ ਐਂਡਿੰਗ ਹੁੰਦਾ ਹੈ।Œਸਿਡ ਅਤੇ ਸੋਨਾਲੀ ਦੀ ਮੁਲਾਕਾਤ ਹੁੰਦੀ ਹੈ ਅਤੇ ਉਹ ਇਕੱਠੇ ‘ਬਿਜ਼ਨੈੱਸ’ ਕਰਨ ਦਾ ਫੈਸਲਾ ਕਰਦੇ ਹਨ। ਉਹ ਇਕ ਅਤੇ ਇਕ ਗਿਆਰਾਂ ਬਣ ਜਾਂਦੇ ਹਨ ਅਤੇ ਉਨ੍ਹਾਂ ਦਾ ਕਿੱਤਾ ਖੂਬ ਤਰੱਕੀ ਕਰਦਾ ਹੈ। ਜਟਿਲ ਤੋਂ ਲੈ ਕੇ ਹਾਸੋਹੀਣੇ ਮਾਮਲੇ ਉਹ ਚੁਟਕੀਆਂ ‘ਚ ਸੁਲਝਾ ਲੈਂਦੇ ਹਨ ਪਰ ਇਕ ਅਜਿਹਾ ਕੇਸ ਉਨ੍ਹਾਂ ਦੇ ਸਾਹਮਣੇ ਆਉਂਦਾ ਹੈ, ਜਿਸ ‘ਚ ਕਈ ਉਤਰਾਅ-ਚੜ੍ਹਾਅ ਅਤੇ ਅੰਨ੍ਹੇ ਮੋੜ ਹਨ। ਇਸ ਕੇਸ ‘ਚ ਉਹ ਖੁਦ ਉਲਝ ਜਾਂਦੇ ਹਨ। ਇਸ ਕੇਸ ਕਾਰਨ ਇਕ ਅਜਿਹਾ ਮੋੜ ਆਉਂਦਾ ਹੈ, ਜਿਸ ਨਾਲ ਦੋਹਾਂ ਦੀ ਜ਼ਿੰਦਗੀ ਉਥਲ-ਪੁਥਲ ਹੋ ਜਾਂਦੀ ਹੈ।Œਸਿਡ ਨੇ ਕਈ ਚੀਜ਼ਾਂ ਪ੍ਰੀਭਾਸ਼ਿਤ ਕਰਨੀਆਂ ਹੁੰਦੀਆਂ ਹਨ ਪਰ ਉਸ ਕੋਲ ਸਮਾਂ ਘੱਟ ਹੁੰਦਾ ਹੈ। ਇਸ ਵਾਰ ਜੋੜੀ ਬ੍ਰੇਕਰਸ ਨੂੰ ਜੋੜੀ ਮੇਕਰਸ ਬਣਨਾ ਪੈਂਦਾ ਹੈ।
ਇਸ ਫ਼ਿਲਮ ਬਾਰੇ ਬਿਪਾਸ਼ਾ ਦਾ ਕਹਿਣੈ, ”ਸੱਚ ਕਹਾਂ ਤਾਂ ਮੈਂ ਪਹਿਲੀ ਵਾਰ ਸੋਨਾਲੀ ਦਾ ਇਕ ਅਜਿਹਾ ਕਿਰਦਾਰ ਨਿਭਾਇਆ ਹੈ, ਜੋ ਮੇਰੀ ਨਿਜੀ ਜ਼ਿੰਦਗੀ ਦੇ ਕਾਫੀ ਨੇੜੇ ਹੈ। ਸੋਨਾਲੀ ਵਾਂਗ ਮੈਂ ਵੀ ਇਸ ਗੱਲ ‘ਚ ਯਕੀਨ ਕਰਦੀ ਹਾਂ ਕਿ ਹਮੇਸ਼ਾ ਅਗਾਂਹ ਵਧਦੇ ਰਹੋ, ਕਿਸੇ ਰਿਸ਼ਤੇ ਲਈ ਉਡੀਕ ਨਾ ਕਰੋ। ਤੁਹਾਨੂੰ ਸਹੀ ਕਾਰਨਾਂ ਕਰਕੇ ਪਿਆਰ ਕਰਨਾ ਚਾਹੀਦੈ।”

ਡਾਈਟਿੰਗ ਹੀਰੋਇਨਾਂ ਦੀ ਨਜ਼ਰ ‘ਚ

editor — Mon, 20 Feb 2012 10:14:47 +0000

ਮੋਟਾਪੇ ਦੀ ਦਰ ਸਾਡੇ ਦੇਸ਼ ‘ਚ ਦਿਨੋ-ਦਿਨ ਵਧਦੀ ਜਾ ਰਹੀ ਹੈ ਅਤੇ ਨੌਜਵਾਨ ਪੀੜ੍ਹੀ ਇਸ ਦੇ ਕਾਰਨ ਨੂੰ ਨਜ਼ਰਅੰਦਾਜ਼ ਕਰ ਰਹੀ ਹੈ। ਗਲਤ ਜੀਵਨਸ਼ੈਲੀ ਅਤੇ ਆਰਾਮਪ੍ਰਸਤੀ ਦੀ ਜ਼ਿੰਦਗੀ ਇਸ ਦਾ ਸਭ ਤੋਂ ਵੱਡਾ ਕਾਰਨ ਹੈ। ਹੀਰੋਇਨਾਂ ਨੂੰ ਵੀ ਇਹ ਆਕਰਸ਼ਕ ਫਿੱਗਰ ਬੈਠੇ-ਬਿਠਾਏ ਹੀ ਨਹੀਂ ਮਿਲੀ।
ਬਾਲੀਵੁੱਡ ਦੀਆਂ ਪਤਲੀਆਂ-ਪਤਲੀਆਂ ਅਤੇ ਸੋਹਣੀਆਂ ਹੀਰੋਇਨਾਂ ਨੂੰ ਦੇਖ ਕੇ ਹਰ ਆਮ ਕੁੜੀ ਦੇ ਮਨ ‘ਚ ਉਸ ਵਾਂਗ ਦਿਸਣ ਦੀ ਇੱਛਾ ਜ਼ੋਰ ਫੜਨ ਲੱਗਦੀ ਹੈ। ਹਰ ਕੋਈ ਆਪਣੀ ਫਿੱਗਰ ਤੋਂ ਸੰਤੁਸ਼ਟ ਨਹੀਂ ਹੁੰਦਾ। ਮੋਟਾਪੇ ਦੀ ਦਰ ਸਾਡੇ ਦੇਸ਼ ‘ਚ ਦਿਨੋ-ਦਿਨ ਵਧਦੀ ਜਾ ਰਹੀ ਹੈ ਅਤੇ ਨੌਜਵਾਨ ਪੀੜ੍ਹੀ ਇਸ ਦੇ ਕਾਰਨ ਨੂੰ ਨਜ਼ਰਅੰਦਾਜ਼ ਕਰ ਰਹੀ ਹੈ। ਗਲਤ ਜੀਵਨਸ਼ੈਲੀ ਅਤੇ ਆਰਾਮਪ੍ਰਸਤੀ ਦੀ ਜ਼ਿੰਦਗੀ ਇਸ ਦਾ ਸਭ ਤੋਂ ਵੱਡਾ ਕਾਰਨ ਹੈ। ਹੀਰੋਇਨਾਂ ਨੂੰ ਵੀ ਇਹ ਆਕਰਸ਼ਕ ਫਿੱਗਰ ਬੈਠੇ-ਬਿਠਾਏ ਹੀ ਨਹੀਂ ਮਿਲੀ। ਇਸ ਦੇ ਪਿੱਛੇ ਉਨ੍ਹਾਂ ਵਲੋਂ ਕੀਤੀ ਸਖਤ ਸਰੀਰਕ ਮਿਹਨਤ ਹੀ ਹੈ। ਇਥੇ ਕੁਝ ਹੀਰੋਇਨਾਂ ਵਲੋਂ ਦਿੱਤੇ ਸੁਝਾਅ ਪੇਸ਼ ਕੀਤੇ ਜਾ ਰਹੇ ਹਨ।
ਸਮੀਰਾ ਰੈੱਡੀ
ਪਹਿਲੀ ਫ਼ਿਲਮ ‘ਚ ਕੁਝ ਸੁਡੌਲ ਨਜ਼ਰ ਆਉਣ ਵਾਲੀ ਸਮੀਰਾ ਨੇ ਆਪਣਾ ਭਾਰ ਘਟਾ ਕੇ ਫਿੱਗਰ ਮੇਂਟੇਨ ਕੀਤੀ ਹੈ ਪਰ ਇਸ ਦੇ ਲਈ ਖਾਣ-ਪੀਣ ਨੂੰ ਤਿਆਗਣਾ ਉਹ ਬਿਲਕੁਲ ਗਲਤ ਕਹਿੰਦੀ ਹੈ। ਉਸ ਮੁਤਾਬਿਕ ਬਹੁਤ ਘੱਟ ਖਾਣਾ ਜਾਂ ਬਿਲਕੁਲ ਨਾ ਖਾਣਾ ਭਾਰ ਘਟਾਉਣ ਦਾ ਸਹੀ ਤਰੀਕਾ ਨਹੀਂ ਹੈ। ਸ਼ਾਰਟ ਟਰਮ ਦੇ ਟੀਚਿਆਂ ਲਈ ਜਿਵੇਂ ਚਾਹੋ, ਉਹੋ ਜਿਹੀ ਫਿੱਗਰ ਹਾਸਲ ਕਰਨ ਲਈ ਇਹ ਠੀਕ ਤਰੀਕਾ ਨਹੀਂ ਹੈ। ਸਿਹਤ ਲਈ ਸਖਤ ਮਿਹਨਤ ਕਰੋ ਅਤੇ ਉਸ ਨੂੰ ਮੇਂਟੇਨ ਰੱਖੋ। ਇਸ ਨੂੰ ਤੁਸੀਂ ਦੂਜਿਆਂ ਲਈ ਕਰਨ ਦੀ ਬਜਾਏ ਖੁਦ ਲਈ ਕਰੋ।
ਪ੍ਰਾਚੀ ਦੇਸਾਈ
ਥੋੜ੍ਹੇ ਜਿਹੇ ਸਮੇਂ ‘ਚ ਹੀ ਛੋਟੇ ਅਤੇ ਵੱਡੇ ਪਰਦੇ ਦੇ ਦਰਸ਼ਕਾਂ ਦੇ ਦਿਲਾਂ ‘ਤੇ ਛਾ ਜਾਣ ਵਾਲੀ ਅਤੇ ਆਪਣੇ ਮੁਸਕਰਾਉਂਦੇ ਚਿਹਰੇ ਲਈ ਜਾਣੀ ਜਾਣ ਵਾਲੀ ਚੁਲਬੁਲੀ ਅਦਾਕਾਰਾ ਪ੍ਰਾਚੀ ਦੇਸਾਈ ਇਸ ਸੰਬੰਧੀ ਕਹਿੰਦੀ ਹੈ ਕਿ ਆਲਸੀ ਨਾ ਬਣੋ, ਹੈਲਦੀ ਖਾਓ (ਇਸ ਦਾ ਮਤਲਬ ਇਹ ਨਹੀਂ ਹੈ ਕਿ ਤੁਸੀਂ ਪਿੱਜ਼ਾ, ਬਰਗਰ ਆਦਿ ਖਾਣਾ ਹੀ ਛੱਡ ਦਿਓ) ਅਤੇ ਜਿੰਨਾ ਵਰਕਆਊਟ ਤੁਸੀਂ ਕਰ ਸਕਦੇ ਹੋ, ਕਰੋ। ਉਸ ਮੁਤਾਬਿਕ ਸਭ ਤੋਂ ਅਹਿਮ ਗੱਲ ਹੈ ਖੁਸ਼ ਰਹਿਣਾ। ਖੁਸ਼ ਰਹੋ, ਜਿਸ ਦੇ ਕਿ ਤੁਸੀਂ ਹੱਕਦਾਰ ਹੋ।
ਅੰਮ੍ਰਿਤਾ ਰਾਵ
ਸੋਹਣੀ-ਸੁਨੱਖੀ ਅਤੇ ਦੇਖਣ ‘ਚ ਛਟਾਂਕੀ ਜਿਹੀ ਨਜ਼ਰ ਆਉਂਦੀ ਅਦਾਕਾਰਾ ਅੰਮ੍ਰਿਤਾ ਰਾਵ ਨੂੰ ਦੇਖ ਕੇ ਲੱਗਦੈ ਕਿ ਇਸਨੇ ਵਾਕਈ ਡਾਈਟਿੰਗ ਦੀ ਪੂਰੀ ਪਾਲਣਾ ਕੀਤੀ ਹੋਵੇਗੀ ਪਰ ਇਸ ਦੇ ਉਲਟ ਉਸ ਦਾ ਤਾਂ ਕੁਝ ਹੋਰ ਹੀ ਕਹਿਣੈ। ਉਸ ਮੁਤਾਬਿਕ ਮੈਂ ਦੇਖਦੀ ਹਾਂ ਕਿ ਅੱਜਕਲ ਬਹੁਤ ਸਾਰੇ ਨੌਜਵਾਨ ਆਪਣਾ ਭਾਰ ਘਟਾਉਣ ਲਈ ਸਿਰਫ ਸਲਾਦ ਅਤੇ ਲਿਕਵਿਡ ਡਾਈਟ ਲੈਂਦੇ ਹਨ। ਹਰ ਕੋਈ ਬਾਲੀਵੁੱਡ ਤੋਂ ਇੰਨਾ ਕੁ ਪ੍ਰੇਰਿਤ ਹੈ ਕਿ ਆਨਸਕ੍ਰੀਨ ਅਦਾਕਾਰ ਜਾਂ ਅਦਾਕਾਰਾ ਵਾਂਗ ਨਜ਼ਰ ਆਉਣਾ ਚਾਹੁੰਦੈ। ਇਸ ਤਰ੍ਹਾਂ ਉਹ ਨਹੀਂ ਜਾਣਦੇ ਕਿ ਉਹ ਆਪਣੇ ਸਿਸਟਮ ਨੂੰ ਕਿੰਨਾ ਨੁਕਸਾਨ ਪਹੁੰਚਾ ਰਹੇ ਹਨ। ਮੈਂ ਹੈਲਦੀ ਫੂਡ ਖਾਂਦੀ ਹਾਂ ਅਤੇ ਇਸ ਗੱਲ ‘ਚ ਯਕੀਨ ਕਰਦੀ ਹਾਂ ਕਿ ਹਰ ਕਿਸੇ ਨੂੰ ਹੈਲਦੀ ਫੂਡ ਖਾਣਾ ਚਾਹੀਦੈ। ਭਾਵੇਂ ਕਿ ਅੰਮ੍ਰਿਤਾ ਦੀ ਦਿੱਖ ਅਤੇ ਉਸ ਦੀਆਂ ਗੱਲਾਂ ‘ਚ ਤਾਲਮੇਲ ਬਿਠਾਉਣਾ ਕੁਝ ਔਖਾ ਲੱਗ ਰਿਹੈ ਪਰ ਇਹ ਬਿਲਕੁਲ ਸੱਚ।
ਕੋਏਨਾ ਮਿੱਤਰਾ
ਫ਼ਿਲਮਾਂ ‘ਚ ਕੋਈ ਬਹੁਤਾ ਕਮਾਲ ਨਾ ਦਿਖਾ ਸਕੀ ਅਤੇ ਸਿਰਫ ਆਈਟਮ ਗਰਲ ਬਣਨ ਪਿੱਛੋਂ ਗੁਆਚ ਜਿਹੀ ਗਈ ਕੋਏਨਾ ਮਿੱਤਰਾ ਦੀ ਫਿੱਗਰ ਵੀ ਕਾਬਿਲ-ਏ-ਤਾਰੀਫ ਹੈ। ਫਿੱਗਰ ਮੇਂਟੇਨ ਰੱਖਣ ਦੇ ਲਈ ਕੋਏਨਾ ਦਾ ਸੁਝਾਅ ਹੈ ਕਿ ਪਿਲਸ ਅਤੇ ਫੈਟ ਬਰਨਸ ਲੈਣ ਦੀ ਬਜਾਏ ਵਰਕ ਆਊਟ ਕਰੋ ਅਤੇ ਸਪੋਰਟਸ ਐਕਟੀਵਿਟੀ ‘ਚ ਹਿੱਸਾ ਲਓ। ਹੈਲਦੀ ਖਾਓ ਅਤੇ ਬਹੁਤ ਜ਼ਿਆਦਾ ਡਾਈਟਿੰਗ ਤੋਂ ਦੂਰ ਰਹੋ ਕਿਉਂਕਿ ਇਹ ਤੁਹਾਡੇ ਚਿਹਰੇ ਦਾ ਗਲੋਅ ਚੁਰਾ ਲੈਂਦੀ ਹੈ।
ਮੰਦਿਰਾ ਬੇਦੀ
ਮੰਦਿਰਾ ਬੇਦੀ ਨੂੰ ਜਦੋਂ ਪਹਿਲੀ ਵਾਰ ਲੜੀਵਾਰ ‘ਸ਼ਾਂਤੀ’ ‘ਚ ਦੇਖਿਆ ਸੀ ਅਤੇ ਅੱਜ ਜਿਵੇਂ ਦੇਖ ਰਹੇ ਹਾਂ, ਉਸ ਨੂੰ ਦੇਖ ਕੇ ਕਿਹਾ ਜਾ ਸਕਦਾ ਹੈ ਕਿ ਉਸ ਦੀ ਫਿੱਗਰ ਇਕ ਬੈਲੇਂਸਡ ਫਿੱਗਰ ਹੈ। ਉਸ ਦਾ ਵੀ ਕੁਝ ਇਹੋ ਕਹਿਣੈ ਕਿ ਤੁਹਾਨੂੰ ਹੈਲਦੀ ਈਟਿੰਗ ਅਤੇ ਲੋੜੀਂਦੀ ਐਕਸਰਸਾਈਜ਼ ‘ਚ ਸੰਤੁਲਨ ਬਣਾ ਕੇ ਰੱਖਣਾ ਚਾਹੀਦੈ। ਖੁਦ ਨੂੰ ਬਹੁਤ ਜ਼ਿਆਦਾ ਤਣਾਅ ‘ਚ ਨਾ ਰੱਖੋ ਅਤੇ ਆਪਣੇ ਸਰੀਰ ਦੀ ਲੋੜ ਮੁਤਾਬਿਕ ਆਪਣੇ ਫਿੱਟਨੈੱਸ ਗੋਲ ਤੈਅ ਕਰਨੇ ਚਾਹੀਦੇ ਹਨ।
ਸੋਹਾ ਅਲੀ ਖਾਨ
ਆਪਣੇ ਜ਼ਮਾਨੇ ਦੀ ਪ੍ਰਸਿੱਧ ਅਦਾਕਾਰਾ ਸ਼ਰਮੀਲਾ ਟੈਗੋਰ ਦੀ ਇਹ ਧੀ ਬਾਲੀਵੁੱਡ ‘ਚ ਆਪਣੀ ਮਾਂ ਜਿੰਨੀ ਸਫਲਤਾ ਤਾਂ ਹਾਸਲ ਨਹੀਂ ਕਰ ਸਕੀ ਪਰ ਮਾਂ ਵਾਂਗ ਹੀ ਫਿੱਟ ਸੋਹਾ ਦਾ ਕਹਿਣੈ ਕਿ ਫਿੱਟਨੈੱਸ ‘ਚ ਕੋਈ ਸ਼ਾਰਟਕੱਟ ਨਹੀਂ ਹੁੰਦਾ। ਉਸ ਮੁਤਾਬਿਕ ਚੰਗਾ ਖਾਓ, ਵਰਕਆਊਟ ਕਰੋ ਅਤੇ ਖੁਸ਼ ਰਹੋ।
ਅਮਿਸ਼ਾ ਪਟੇਲ
ਇਸ ਲੇਖ ਦੇ ਅੰਤ ‘ਚ ਅਸੀਂ ਚਰਚਾ ਕਰਾਂਗੇ ਬਾਲੀਵੁੱਡ ਦੀ ਉਸ ਗੁਆਚ ਜਿਹੀ ਗਈ ਅਤੇ ਅੱਜਕਲ ਮੁੜ ਸਰਗਰਮ ਅਦਾਕਾਰਾ ਅਮਿਸ਼ਾ ਪਟੇਲ ਦੀ, ਜਿਸ ਦਾ ਸਰੀਰਕ ਭਾਰ ਵਧਦਾ-ਘਟਦਾ ਰਿਹਾ ਹੈ। ਹੁਣ ਫਿਰ ਸ਼ੇਪ ‘ਚ ਆਈ ਅਮਿਸ਼ਾ ਖੁਦ ਨੂੰ ਕਿੰਝ ਫਿੱਟ ਮੰਨਦੀ ਹੈ, ਜਾਣਦੇ ਹਾਂ ਉਸੇ ਦੀ ਜ਼ੁਬਾਨੀ। ਅਮਿਸ਼ਾ ਕਹਿੰਦੀ ਹੈ, ”ਭਾਰ ਘਟਾਉਣ ਲਈ ਕ੍ਰੈਸ਼ ਡਾਈਟਿੰਗ ਅਤੇ ਭੁੱਖੇ ਰਹਿਣ ਦੀ ਦੌੜ ‘ਚ ਸ਼ਾਮਲ ਨਾ ਹੋਵੋ।” ਕੁਲ ਮਿਲਾ ਕੇ ਜੇਕਰ ਝਾਤ ਮਾਰੀ ਜਾਏ ਤਾਂ ਜ਼ਿਆਦਾਤਰ ਅਭਿਨੇਤਰੀਆਂ ਨੇ ਭਾਰ ਘਟਾਉਣ ਲਈ ਖਾਣਾ ਘੱਟ ਖਾਣ ਨੂੰ ਬਿਲਕੁਲ ਸਿਰੇ ਤੋਂ ਨਕਾਰਿਆ ਹੈ ਅਤੇ ਵਰਕਆਊਟ ‘ਤੇ ਜ਼ੋਰ ਦਿੱਤਾ ਹੈ।

ਜੰਮੂ-ਕਸ਼ਮੀਰ ਤੇ ਹਿਮਾਚਲ ‘ਚ ਬਰਫਬਾਰੀ, ਮੈਦਾਨਾਂ ‘ਚ ਮੀਂਹ

editor — Mon, 20 Feb 2012 10:07:35 +0000

ਚੰਡੀਗੜ੍ਹ, 20 ਫਰਵਰੀ (ਰੋਡ ਨਿਊਜ਼ ਬਿਊਰੋ)- ਜੰਮੂ-ਕਸ਼ਮੀਰ, ਪੰਜਾਬ ਅਤੇ ਹਰਿਆਣਾ ‘ਚ ਲੋਕਾਂ ਨੂੰ ਸੀਤ ਲਹਿਰ ਤੋਂ ਕੋਈ ਰਾਹਤ ਮਿਲਦੀ ਨਜ਼ਰ ਨਹੀਂ ਆਉਂਦੀ। ਐਤਵਾਰ ਵੀ ਪੂਰੇ ਖੇਤਰ ‘ਚ ਮੌਸਮ ਖਰਾਬ ਰਿਹਾ। ਜਿੱਥੇ ਹਿਮਾਚਲ ਪ੍ਰਦੇਸ਼ ਅਤੇ ਜੰਮੂ-ਕਸ਼ਮੀਰ ਵਿੱਚ ਕਈ ਉਚੇਰੇ ਇਲਾਕਿਆਂ ‘ਚ ਬਰਫ ਪਈ, ਉਥੇ ਪੰਜਾਬ ਅਤੇ ਹਰਿਆਣਾ ‘ਚ ਮੀਂਹ ਪਿਆ। ਚੰਡੀਗੜ੍ਹ ਅਤੇ ਨਾਲ ਲੱਗਦੇ ਇਲਾਕਿਆਂ ‘ਚ ਮਿੱਟੀ ਭਰੀ ਹਨੇਰੀ ਚੱਲੀ। ਇਸ ਕਾਰਨ ਪੂਰੇ ਖੇਤਰ ਵਿੱਚ ਤਾਪਮਾਨ ‘ਚ ਕਮੀ ਹੋਈ ਹੈ। ਸ਼ਿਮਲਾ ਵਿੱਚ ਘੱਟੋ-ਘੱਟ ਤਾਪਮਾਨ ਪੰਜ ਡਿਗਰੀ ਸੈਲਸੀਅਸ ਸੀ। ਧਰਮਸ਼ਾਲਾ ‘ਚ ਚਾਰ ਅਤੇ ਨਾਹਨ ਵਿੱਚ 10 ਡਿਗਰੀ ਸੈਲਸੀਅਸ ਤਾਪਮਾਨ ਰਿਹਾ। ਸ੍ਰੀਨਗਰ ਵਿਖੇ 1.4, ਅੰਮ੍ਰਿਤਸਰ ਵਿਖੇ ਛੇ ਡਿਗਰੀ ਸੈਲਸੀਅਸ ਤਾਪਮਾਨ ਦਰਜ ਕੀਤਾ ਗਿਆ।

ਹਾਕੀ ਦੇ ਓਲੰਪਿਕ ਕੁਆਲੀਫਾਈ ਮੈਚ ਵਿੱਚ ਭਾਰਤੀ ਪੁਰਸ਼ਾਂ ਦੀ ਇਟਲੀ ‘ਤੇ 8-1 ਗੋਲਾਂ ਦੀ ਜਿੱਤ ਖਿਡਾਰਨਾਂ ਨੇ ਕੈਨੇਡਾ ਨੂੰ 4-1 ਨਾਲ ਹਰਾਇਆ

editor — Mon, 20 Feb 2012 10:03:11 +0000

ਨਵੀਂ ਦਿੱਲੀ, 20 ਫਰਵਰੀ (ਰੋਡ ਨਿਊਜ਼ ਬਿਊਰੋ)- ਓਲੰਪਿਕ ਕੁਆਲੀਇੰਗ ਹਾਕੀ ਟੂਰਨਾਮੈਂਟ ਵਿੱਚ ਜਿੱਤਾਂ ਦੇ ਰਾਹ ਤੁਰੀ ਹਿੰਦ ਦੀ ਹਾਕੀ ਟੀਮ ਨੇ ਇਤਾਲਵੀ ਹਾਕੀ ਟੀਮ ਨੂੰ 8-1 ਨਾਲ ਦਰੜ ਕੇ ਲਗਾਤਾਰ ਦੂਜੀ ਜਿੱਤ ਹਾਸਲ ਕੀਤੀ। ਮੇਜ਼ਬਾਨ ਟੀਮ ਨੇ ਮੁਕਾਬਲੇ ਵਿੱਚ ਪਹਿਲੀ ਜਿੱਤ ਸਿੰਗਾਪੁਰ ‘ਤੇ ਹਾਸਲ ਕੀਤੀ ਸੀ। ਇਟਲੀ ਦੀ ਇਹ ਦੂਜੀ ਹਾਰ ਸੀ।
ਇਟਲੀ ਵਿਰੁੱਧ ਮੈਚ ‘ਚ ਭਾਰਤੀ ਟੀਮ ਪਹਿਲੇ ਅੱਧ ‘ਚ 6-1 ਗੋਲ ਨਾਲ ਅੱਗੇ ਸੀ। ਜੇਤੂ ਟੀਮ ਨੇ ਦੂਜੇ ਮੱਧ ‘ਚ ਵੀ 2 ਗੋਲ ਕੀਤੇ। ਮੈਚ ਦੀ ਖਾਸੀਅਤ ਇਹ ਰਹੀ ਕਿ ਜੇਤੂ ਟੀਮ ਨੂੰ ਚਾਰ ਅਤੇ ਮਹਿਮਾਨ ਟੀਮ ਨੂੰ ਇੱਕ ਪੈਨਲਟੀ ਕਾਰਨਰ ਮਿਲਿਆ ਅਤੇ ਪੰਜੇ ਪੈਨਲਟੀ ਕਾਰਨਰਾਂ ਤੋਂ ਗੋਲ ਹੋਏ। ਡਰੈਗ ਫਲਿੱਕਰ ਸੰਦੀਪ ਸਿੰਘ ਨੇ ਤਿੰਨ ਪੈਨਲਟੀ ਕਾਰਨਰਾਂ ਨੂੰ ਗੋਲਾਂ ‘ਚ ਬਦਲ ਕੇ ਤਿੱਕੜੀ ਜਮਾਈ, ਜਦ ਕਿ ਇੱਕ ਪੈਨਲਟੀ ਕਾਰਨਰ ਤੋਂ ਰਘੂਨਾਥ ਨੇ ਗੋਲ ਕੱਢਿਆ। ਭਾਰਤ ਵਲੋਂ ਪੰਜਵਾਂ ਅਤੇ ਛੇਵਾਂ ਗੋਲ 29ਵੇਂ ਅਤੇ 31ਵੇਂ ਮਿੰਟ ਵਿੱਚ ਟੀਮ ਦੇ ਹਮਲਾਵਰ ਖਿਡਾਰੀਆਂ ਸੁਨੀਲ ਅਤੇ ਗੁਰਵਿੰਦਰ ਸਿੰਘ ਚੰਦੀ ਦੀ ਸਟਿੱਕ ‘ਚੋਂ ਨਿਕਲੇ। ਮਹਿਮਾਨ ਟੀਮ ਦੇ ਅਲੈਂਗਜ਼ੈਡਰ ਨਾਨੀ ਨੇ 15ਵੇਂ ਮਿੰਟ ‘ਚ ਪੈਨਲਟੀ ਕਾਰਨਰ ਰਾਹੀਂ ਗੋਲ ਉਤਾਰਿਆ।
ਉਪ-ਕਪਤਾਨ ਸਰਦਾਰਾ ਸਿੰਘ ਦੀ ਸਰਦਾਰੀ ‘ਚ ਖੇਡੇ ਗਏ ਮੈਚ ‘ਚ ਕਪਤਾਨ ਨੇ ਪੂਰੇ ਮੈਚ ‘ਚ ਆਪਣੇ ਹਮਲਾਵਰਾਂ ਨੂੰ ਬਾਲਾਂ ਬਣਾ ਕੇ ਦੇਣ ਦੇ ਨਜ਼ਾਰੇ ਬੰਨ੍ਹੀ ਰੱਖੇ। ਦੂਜੇ ਹਾਫ ਵਿੱਚ ਕੀਤੇ ਸੱਤਵੇਂ ਅਤੇ ਅੱਠਵੇਂ ਗੋਲ ਵਿੱਚ ਰੱਖਿਅਕ ਸੰਦੀਪ ਸਿੰਘ ਦਾ ਮੁੱਖ ਯੋਗਦਾਨ ਰਿਹਾ। ਮੈਚ ਦੇ 38ਵੇਂ ਅਤੇ 52ਵੇਂ ਮਿੰਟ ਵਿੱਚ ਸੰਦੀਪ ਸਿੰਘ ਤੋਂ ਡੀ ਅੰਦਰ ਮਿਲੇ ਸ਼ਾਨਦਾਰ ਪਾਸਾਂ ਤੋਂ ਫਾਰਵਰਡ ਸੁੀਲ ਅਤੇ ਸ਼ਵਿੰਦਰ ਸਿੰਘ ਨੇ ਦੋ ਮੈਦਾਨੀ ਗੋਲ ਕੀਤੇ। ਲੋਕਲ ਟੀਮ ਨੂੰ 63ਵੇਂ ਮਿੰਟ ਵਿੱਚ ਪੰਜਵਾਂ ਪੈਨਲਟੀ ਕਾਰਨਰ ਮਿਲਿਆ, ਪਰ ਇਸ ਵਾਰ ਸੰਦੀਪ ਗੋਲ ਕਰਨ ਵਿੱਚ ਨਾਕਾਮ ਰਿਹਾ। ਉਂਜ ਸੰਦੀਪ ਨੇ ਦੋ ਮੈਚਾਂ ‘ਚ 4 ਗੋਲ ਕਰ ਕੇ ਟੂਰਨਾਮੈਂਟ ਵਿੱਚ ਟਾਪ ਸਕੋਰਰ ਬਣਨ ਦੀ ਉਮੀਦ ਜਗਾਈ ਹੋਈ ਹੈ।
ਆਪਣਾ ਪਹਿਲਾ ਮੈਚ ਯੂਕਰੇਨ ਟੀਮ ਨਾਲ 1-1 ਗੋਲ ਨਾਲ ਬਰਾਬਰ ਰੱਖਣ ਵਾਲੀ ਭਾਰਤੀ ਮਹਿਲਾ ਟੀਮ ਨੇ ਅੱਜ ਘਰੇਲੂ ਹਾਕੀ ਪ੍ਰੇਮੀਆਂ ਸਾਹਮਣੇ ਕੈਨੇਡਾ ਤੇ 4-1 ਗੋਲ ਅੰਤਰ ਦੀ ਜਿੱਤ ਹਾਸਲ ਕੀਤੀ। ਜੇਤੂ ਟੀਮ ਪਹਿਲੇ ਮੱਧ ਵਿੱਚ 3-0 ਗੋਲ ਨਾਲ ਅੱਗੇ ਸੀ। ਆਪਣੇ ਘਰੋਗੀ ਮੈਦਾਨ ‘ਤੇ ਜਾਨਦਾਰ ਖੇਡ ਦਾ ਮੁਜ਼ਾਹਰਾ ਕਰਦਿਆਂ ਮੇਜ਼ਬਾਨ ਹਾਕੀ ਕੁੜੀਆਂ ਨੇ ਮਹਿਮਾਨ ਕੈਨੇਡਾ ਦੀ ਟੀਮ ਨੂੰ ਮੈਦਾਨ ਵਿੱਚ ਖੇਡ ਦੇ ਹਰ ਪੱਖ ਤੋਂ ਪਛਾੜੀ ਰੱਖਿਆ। ਉਂਜ ਘਰੇਲੂ ਟੀਮ ਦੀ ਖੇਡ ਵਿੱਚ ਪੂਰੇ ਦਸ ਮਿੰਟ ਪਿੱਛੋਂ ਸੈਂਟਰ ਫਾਰਵਰਡ ਖਿਡਾਰਨ ਰਾਣੀ ਰਾਮਪਾਲ ਦੀ ਮੌਜੂਦਗੀ ਨਾਲ ਪੈਨਾਪਣ ਆਇਆ। ਮੈਚ ਦੇ ਸੱਤਵੈਂ ਮਿੰਟ ਵਿੱਚ ਲੋਕਲ ਟੀਮ ਨੂੰ ਪੈਨਲਟੀ ਕਾਰਨਰ ਮਿਲਿਆ, ਪਰ ਦਸ ਨੰਬਰ ਜਰਸੀ ਵਾਲੀ ਅਨੁਰਾਧਾ ਦੇਵੀ ਮੌਕੇ ਦਾ ਲਾਭ ਨਾ ਲੈ ਸਕੀ। ਮੈਚ ਦੇ 11ਵੇਂ ਮਿੰਟ ਰਾਣੀ ਰਾਮਪਾਲ ਤੋਂ ਡੀ ਸਰਕਲ ‘ਚ ਮਿਲੇ ਸ਼ਾਨਦਾਰ ਪਾਸ ਨੂੰ ਜਸਜੀਤ ਕੌਰ ਨੇ ਸਾਹਮਣੇ ਖਾਲੀ ਪਏ ਗੋਲ ਤੋਂ ਬਾਲ ਨੂੰ ਬਾਹਰ ਹਿੱਟ ਮਾਰ ਕੇ ਬੇਕਾਰ ਕਰ ਦਿੱਤਾ। ਭਾਰਤੀ ਟੀਮ ਦਾ ਪਹਿਲਾ ਗੋਲ 15ਵੇਂ ਮਿੰਟ ਵਿੱਚ ਦੂਜੇ ਪੈਨਲਟੀ ਕਾਰਨਰ ਤੋਂ ਉਦੋਂ ਹੋਇਆ, ਜਦੋਂ ਅਨੁਰਾਧਾ ਦੇਵੀ ਨੇ ਵੇਰੀਏਸ਼ਨ ਰਾਹੀਂ ਬਾਲ ਵਾਈ. ਸੌਂਦਰਿਆ ਨੂੰ ਦਿੱਤਾ, ਜਿਸ ਨੂੰ ਸੌਂਦਰਿਆ ਨੇ ਗੋਲ ਦਾ ਰਸਤਾ ਦਿਖਾਉਣ ‘ਚ ਕੋਈ ਕੋਤਾਹੀ ਨਾ ਵਰਤੀ।
ਹਮਲਾਵਰ ਸਟਰਾਈਕਰ ਰਾਣੀ ਰਾਮਪਾਲ ਨੇ ਆਪਣੀ ਸਟਿੱਕ ਕਲਾ ਦਾ ਮੁਜ਼ਾਹਰਾ ਕਰਦਿਆਂ 18ਵੇਂ ਮਿੰਟ ‘ਚ ਮੈਦਾਨੀ ਗੋਲ ਕਰ ਕੇ ਸਕੋਰ 2-0 ਕੀਤਾ। ਇਸ ਤੋਂ ਬਾਅਦ ਮੇਜ਼ਬਾਨ ਟੀਮ ਨੂੰ 25ਵੇਂ ਮਿੰਟ ਵਿੱਚ ਲਗਾਤਾਰ ਚਾਰ ਪੈਨਲਟੀ ਕਾਰਨਰ ਨਸੀਬ ਹੋਏ, ਜਿਸ ਵਿੱਚ ਚੌਥੇ ਪੈਨਲਟੀ ਕਾਰਨਰ ਤੋਂ ਐਸ ਚਾਨੂ ਨੇ ਗੋਲ ਕਰ ਕੇ ਟੀਮ ਨੂੰ ਜਿੱਤ ਦੇ ਰਾਹ ਤੋਰੀ ਰੱਖਿਆ। ਦੂਜੇ ਹਾਫ ‘ਚ 48ਵੇਂ ਮਿੰਟ ‘ਚ ਰਾਮਪਾਲ ਰਾਣੀ ਤੋਂ ਡੀ ਵਿੱਚ ਮਿਲੇ ਵਧੀਆ ਕਰਾਸ ਤੋਂ ਅਨੁਰਾਧਾ ਦੇਵੀ ਨੇ ਗੋਲ ਬਣਾਉਣ ‘ਚ ਗਲਤੀ ਨਹੀਂ ਕੀਤੀ। ਆਖਰੀ ਮਿੰਟ ਵਿੱਚ ਭਾਰਤੀ ਗੋਲ ਅੱਗੇ ਪਏ ਰੋਲ-ਘਚੋਲੇ ਦਾ ਲਾਹਾ ਲੈਂਦਿਆਂ 69ਵੇਂ ਮਿੰਟ ‘ਚ ਕੈਨੇਡਾ ਦੀ 13 ਨੰਬਰ ਜਰਸੀ ਵਾਲੀ ਖਿਡਾਰਨ ਐਚ ਹਨ੍ਹਾ ਇੱਕ ਗੋਲ ਉਤਾਰਨ ‘ਚ ਸਫਲ ਹੋ ਗਈ। ਆਖਰੀ ਮੈਚ 4-1 ਨਾਲ ਮੇਜ਼ਬਾਨ ਟੀਮ ਦੀ ਝੋਲੀ ‘ਚ ਪਿਆ।

ਉਤਰ ਪ੍ਰਦੇਸ਼ ‘ਚ ਚੌਥੇ ਗੇੜ ਲਈ 57 ਫੀਸਦੀ ਮਤਦਾਨ

editor — Mon, 20 Feb 2012 10:01:30 +0000

ਲਖਨਊ, 20 ਫਰਵਰੀ (ਰੋਡ ਨਿਊਜ਼ ਬਿਊਰੋ)- ਉਤਰ ਪ੍ਰਦੇਸ਼ ਵਿਧਾਨ ਸਭਾ ਚੋਣਾਂ ਦੇ ਚੌਥੇ ਗੇੜ ਦੌਰਾਨ ਅੱਜ 57 ਫੀਸਦੀ ਵੋਟਾਂ ਪਈਆਂ। ਇਸ ਗੇੜ ਦੌਰਾਨ ਨਹਿਰੂ-ਗਾਂਧੀ ਪਰਵਾਰ ਦਾ ਗੜ੍ਹ ਮੰਨੇ ਜਾਂਦੇ ਅਮੇਠੀ, ਰਾਏ ਬਰੇਲੀ ਤੇ ਬੁੰਦੇਲਖੰਡ ਵਿੱਚ ਲੋਕਾਂ ਨੇ ਵੋਟਾਂ ਪਾਈਆਂ। ਇਸ ਦੌਰਾਨ 1.74 ਕਰੋੜ ਤੋਂ ਉਪਰ ਵੋਟਰਾਂ ਨੇ ਮਤਦਾਨ ਕਰ ਕੇ 967 ਉਮੀਦਵਾਰਾਂ ਦੀ ਕਿਸਮਤ ਇਲੈਕਟ੍ਰੋਨਿਕ ਵੋਟਿੰਗ ਮਸ਼ੀਨਾਂ ਵਿੱਚ ਬੰਦ ਕਰ ਦਿੱਤੀ ਹੈ। ਬਾਂਦਾ ਅਤੇ ਚਿਤਰਕੂਟ ਵਿਖੇ ਵੀ ਵੋਟਰਾਂ ਵਿੱਚ ਕਾਫੀ ਉਤਸ਼ਾਹ ਦੇਖਿਆ ਗਿਆ। ਇਹ ਇਲਾਕੇ ਲੁੱਟਾਂ-ਖੋਹਾਂ ਤੋਂ ਕਾਫੀ ਪ੍ਰਭਾਵਤ ਹਨ।
ਚੌਥੇ ਗੇੜ ਦੇ ਇਸ ਮਤਦਾਨ ਦੌਰਾਨ ਸਖਤ ਸੁਰੱਖਿਆ ਪ੍ਰਬੰਧਾਂ ਹੇਠ 11 ਜ਼ਿਲਿਆਂ ਵਿੱਚ ਸਵੇਰੇ 7 ਵਜੇ ਵੋਟਾਂ ਪੈਣੀਆਂ ਸ਼ੁਰੂ ਹੋਈਆਂ। ਚੋਣ ਅਮਲੇ ਮੁਤਾਬਕ ਵੋਟਾਂ ਅਮਨ-ਅਮਾਨ ਨਾਲ ਭੁਗਤੀਆਂ। ਇਸ ਗੇੜ ਵਿੱਚ 103 ਅਪਰਾਧੀ ਪਿਛੋਕੜ ਵਾਲੇ ਉਮੀਦਵਾਰ ਤੇ 139 ਕਰੋੜਪਤੀ ਉਮੀਦਵਾਰ ਵੀ ਮੈਦਾਨ ‘ਚ ਸਨ। ਚੋਣਾਂ ਦੇ ਰਹਿੰਦੇ ਗੇੜਾਂ ਲਈ ਮਤਦਾਨ 23 ਤੇ 28 ਫਰਵਰੀ ਅਤੇ 3 ਮਾਰਚ ਨੂੰ ਹੋਵੇਗਾ।

ਜੂਨਾਗੜ੍ਹ ਦੇ ਸਿ਼ਵਰਾਤਰੀ ਮੇਲੇ ‘ਚ ਭਾਜੜ, ਛੇ ਦੀ ਮੌਤ

editor — Mon, 20 Feb 2012 09:57:10 +0000

ਜੂਨਾਗੜ੍ਹ (ਗੁਜਰਾਤ), 20 ਫਰਵਰੀ (ਰੋਡ ਨਿਊਜ਼ ਬਿਊਰੋ)- ਸ਼ਿਵਰਾਤਰੀ ਤੋਂ ਇੱਕ ਦਿਨ ਪਹਿਲਾਂ ਗੁਜਰਾਤ ਦੇ ਜੂਨਾਗੜ੍ਹ ‘ਚ ਭਵਨਾਥ ਮੰਦਰ ਕੋਲ ਮੇਲੇ ‘ਚ ਭਾਜੜ ਪੈ ਗਈ, ਜਿਸ ਨਾਲ ਛੇ ਸ਼ਰਧਾਲੂਆਂ ਦੀ ਮੌਤ ਹੋ ਗਈ। ਮਰਨ ਵਾਲਿਆਂ ‘ਚ ਇੱਕ ਬੱਚਾ ਅਤੇ ਤਿੰਨ ਔਰਤਾਂ ਸ਼ਾਮਲ ਹਨ।
ਸ਼ਿਵਰਾਤਰੀ ਤੋਂ ਇੱਕ ਦਿਨ ਪਹਿਲਾਂ ਭਵਨਾਥ ਮੰਦਰ ਨੇੜੇ ਮੇਲਾ ਲੱਗਾ ਸੀ। ਇਸ ਮੇਲੇ ਵਿੱਚ ਲੱਖਾਂ ਸ਼ਰਧਾਲੂ ਜਮ੍ਹਾਂ ਹੋਏ ਸਨ। ਦੱਸਿਆ ਜਾਂਦਾ ਹੈ ਕਿ ਮੰਦਰ ਵੱਲ ਜਾਣ ਵਾਲੀ ਸੜਕ ‘ਤੇ ਜਾਮ ਲੱਗਣ ਤੋਂ ਬਾਅਦ ਭਾਜੜ ਪੈ ਗਈ, ਜਿਸ ਵਿੱਚ ਛੇ ਜਣਿਆਂ ਦੀ ਮੌਤ ਹੋ ਗਈ। ਹਾਦਸੇ ਤੋਂ ਬਾਅਦ ਰਾਹਤ ਤੇ ਬਚਾਅ ਕੰਮ ਸ਼ੁਰੂ ਹੋ ਗਏ। ਮਰਨ ਵਾਲਿਆਂ ਦੀ ਗਿਣਤੀ ਵਧਣ ਦਾ ਖਦਸ਼ਾ ਜ਼ਾਹਰ ਕੀਤਾ ਜਾ ਰਿਹਾ ਹੈ। ਇਸ ਘਟਨਾ ਨੇ ਇੱਕ ਵਾਰ ਮੁੜ ਧਾਰਮਿਕ ਥਾਵਾਂ ‘ਤੇ ਭੀੜ ਨੂੰ ਕਾਬੂ ਕਰਨ ਲਈ ਪ੍ਰਸ਼ਾਸਨ ਵਲੋਂ ਚੁੱਕੇ ਜਾਂਦੇ ਕਦਮਾਂ ‘ਤੇ ਸਵਾਲੀਆ ਨਿਸ਼ਾਨ ਲਾ ਦਿੱਤਾ ਹੈ।

ਈਰਾਨ ਨੇ ਪਾਬੰਦੀਆਂ ਦੇ ਜਵਾਬ ‘ਚ ਉਠਾਇਆ ਕਦਮ : ਫਰਾਂਸ, ਬ੍ਰਿਟੇਨ ਨੂੰ ਤੇਲ ਵਿਕਰੀ ਰੋਕੀ -ਭੂ-ਮੱਧ ਸਾਗਰ ‘ਚ ਉਤਾਰੇ ਜੰਗੀ ਬੇੜੇ

editor — Mon, 20 Feb 2012 09:53:51 +0000

ਤਹਿਰਾਨ, 20 ਫਰਵਰੀ (ਰੋਡ ਨਿਊਜ਼ ਬਿਊਰੋ)- ਈਰਾਨ ਨੇ ਜੁਆਬੀ ਕਾਰਵਾਈ ਕਰਦਿਆਂ ਫਰਾਂਸ ਅਤੇ ਬ੍ਰਿਟੇਨ ਨੂੰ ਸੀਮਤ ਤੇਲ ਵਿਕਰੀ ਰੋਕ ਦਿੱਤੀ ਹੈ। ਈਰਾਨ ਨੇ ਯੂਰਪੀਨ ਯੂਨੀਅਨ ਵਲੋਂ ਤੇਲ ‘ਤੇ ਲਾਈਆਂ ਗਈਆਂ ਪੜਾਅਵਾਰ ਪਾਬੰਦੀਆਂ ਦੇ ਜਵਾਬ ਵਿੱਚ ਇਹ ਕਦਮ ਉਠਾਇਆ ਹੈ। ਇਹ ਰੋਕ ਅਜੇ ਪੂਰੀ ਤਰ੍ਹਾਂ ਲਾਗੂ ਨਹੀਂ ਹੋਈ।
ਤੇਲ ਮੰਤਰਾਲੇ ਦੇ ਬੁਲਾਰੇ ਰਜਾ ਨਿਕਜਾਡ ਰਹਿਬਰ ਨੇ ਇਕ ਬਿਆਨ ਵਿੱਚ ਕਿਹਾ ਹੈ ਕਿ ਬਰਤਾਨੀਆ ਤੇ ਫਰਾਂਸੀਸੀ ਕੰਪਨੀਆਂ ਨੂੰ ਤੇਲ ਦੀ ਵਿਕਰੀ ਰੋਕ ਦਿੱਤੀ ਗਈ ਹੈ। ਮੰਤਰਾਲਾ ਦੀ ਵੈਬਸਾਈਟ ‘ਤੇ ਆਏ ਇਸ ਬਿਆਨ ‘ਚ ਕਿਹਾ ਗਿਆ ਹੈ ਕਿ ਅਸੀਂ ਬ੍ਰਿਟੇਨ ਅਤੇ ਫਰਾਂਸੀਸੀ ਕੰਪਨੀਆਂ ਦੀ ਜਗ੍ਹਾ ਹੋਰ ਦੇਸ਼ਾਂ ਨੂੰ ਤੇਲ ਸਪਲਾਈ ਕਰਨ ਲਈ ਕਦਮ ਚੁੱਕੇ ਹਨ। ਈਰਾਨ ਦੇ ਇਸ ਫੈਸਲੇ ਦਾ ਕੋਈ ਜ਼ਿਆਦਾ ਅਸਰ ਹੋਣ ਦਾ ਅੰਦਾਜ਼ਾ ਨਹੀਂ ਹੈ, ਕਿਉਂਕਿ ਇਨ੍ਹਾਂ ਦੋਵਾਂ ਦੇਸ਼ਾਂ ਦਾ ਈਰਾਨ ਨਾਲ ਤੇਲ ਵਪਾਰ ਮਾਮੂਲੀ ਹੈ। ਬ੍ਰਿਟੇਨ ਹੁਣ ਇਸ ਕੋਲੋਂ ਤੇਲ ਲੈਂਦਾ ਹੀ ਨਹੀਂ, ਪਰ ਇਸ ਕਦਮ ਨਾਲ ਇਟਲੀ, ਸਪੇਨ ਤੇ ਯੂਨਾਨ ਵਰਗੇ ਦੂਸਰੇ ਯੂਰਪੀ ਦੇਸ਼ਾਂ ਲਈ ਇਹ ਚੇਤਾਵਨੀ ਮੰਨੀ ਜਾ ਰਹੀ ਹੈ, ਜੋ ਈਰਾਨੀ ਤੇਲ ‘ਤੇ ਕਾਫੀ ਨਿਰਭਰ ਹਨ। ਇਸੇ ਦੌਰਾਨ ਈਰਾਨ ਦੇ ਅੱਜ ਦੇ ਫੈਸਲੇ ਤੋਂ ਪ੍ਰਭਾਵਤ ਦੇਸ਼ਾਂ ਨੇ ਕਿਹਾ ਕਿ ਉਹ ਈਰਾਨੀ ਤੇਲ ਨਾ ਖਰੀਦਣ ਦੇ ਯੂਰਪੀਨ ਯੂਨੀਅਨ ਦੇ ਫੈਸਲੇ ਵਿੱਚ ਸ਼ਾਮਲ ਹਨ।
ਉਧਰ ਈਰਾਨ ਨੇ ਇਸਰਾਈਲ ਅਤੇ ਅਮਰੀਕਾ ਸਮੇਤ ਆਪਣੇ ਸਭ ਵਿਰੋਧੀਆਂ ਦਾ ਮੂੰਹ ਤੋੜ ਜਵਾਬ ਦਿੰਦੇ ਹੋਏ ਐਤਵਾਰ ਸਵੇਜ਼ ਨਹਿਰ ਦੇ ਰਸਤੇ ਭੂ-ਮੱਧ ਸਾਗਰ ਵਿੱਚ ਆਪਣੇ ਜੰਗੀ ਬੇੜੇ ਉਤਾਰ ਦਿੱਤੇ ਹਨ। ਖਬਰ ਏਜੰਸੀ ਇਰਨਾ ਨੇ ਦੇਸ਼ ਦੇ ਸਮੁੰਦਰੀ ਫੌਜ ਦੇ ਮੁਖੀ ਐਡਮਿਰਲ ਹਬੀਬ-ਉਲਾ ਸਿਆਰੀ ਦੇ ਹਵਾਲੇ ਨਾਲ ਕਿਹਾ ਕਿ ਈਰਾਨ ਨੇ ਭੂ-ਮੱਧ ਸਾਗਰ ਵਿੱਚ ਆਪਣੇ ਜੰਗੀ ਬੇੜੇ ਤਾਇਨਾਤ ਕਰਕੇ ਅਮਰੀਕਾ ਸਮੇਤ ਸਾਰੇ ਵਿਰੋਧੀਆਂ ਨੂੰ ਆਪਣੀ ਤਾਕਤ ਦਾ ਅਹਿਸਾਸ ਕਰਵਾ ਦਿੱਤਾ ਹੈ। ਈਰਾਨ ਦੀ ਸਮੁੰਦਰੀ ਫੌਜ ਇਸਲਾਮੀ ਕ੍ਰਾਂਤੀ ਪਿੱਛੋਂ ਦੂਜੀ ਵਾਰ ਸਵੇਜ਼ ਨਹਿਰ ਦੇ ਰਸਤੇ ਤੋਂ ਭੂ-ਮੱਧ ਸਾਗਰ ਤੱਕ ਪੁੱਜੀ ਹੈ। ਐਡਮਿਰਲ ਸਿਆਰੀ ਨੇ ਨਾ ਤਾਂ ਇਹ ਦੱਸਿਆ ਕਿ ਕਿੰਨੇ ਜੰਗੀ ਬੇੜੇ ਤਾਇਨਾਤ ਕੀਤੇ ਗਏ ਹਨ ਤੇ ਨਾ ਭਵਿੱਖ ਦੀ ਯੋਜਨਾ ਬਾਰੇ ਕੋਈ ਜਾਣਕਾਰੀ ਦਿੱਤੀ। ਉਨ੍ਹਾਂ ਸਿਰਫ ਇੰਨਾ ਦੱਸਿਆ ਕਿ ਇਹ ਜੰਗੀ ਬੇੜੇ ਪਹਿਲਾਂ ਸਾਊਦੀ ਅਰਬ ਦੇ ਬੰਦਰਗਾਹ ਸ਼ਹਿਰ ਜਦਾਹ ਦੇ ਕੰਢੇ ‘ਤੇ ਖੜੇ ਸਨ। ਇਹ ਜੰਗੀ ਬੇੜੇ ਉਂਝ ਤਾਂ ਸ਼ਾਂਤੀ ਦਾ ਸੰਦੇਸ਼ ਲਈ ਤਾਇਨਾਤ ਕੀਤੇ ਗਏ ਹਨ, ਪਰ ਉਹ ਨਾਲ ਹੀ ਈਰਾਨ ਦੀ ਤਾਕਤ ਨੂੰ ਵੀ ਦਰਸਾਉਂਦੇ ਹਨ।
ਇਥੇ ਇਹ ਗੱਲ ਦੱਸਣ ਯੋਗ ਹੈ ਕਿ ਈਰਾਨ ਨੇ ਅਮਰੀਕਾ ਅਤੇ ਇਸਰਾਈਲ ਦੀਆਂ ਚਿਤਾਵਨੀਆਂ ਨੂੰ ਟਿੱਚ ਜਾਣਦਿਆਂ ਇਹ ਕਦਮ ਚੁੱਕਿਆ ਹੈ। ਅਮਰੀਕੀ ਰੱਖਿਆ ਮੰਤਰੀ ਪੇਨੇਟਾ ਨੇ ਸ਼ਨੀਵਾਰ ਈਰਾਨ ਨੂੰ ਸਖਤ ਚੇਤਾਵਨੀ ਦਿੱਤੀ ਸੀ ਕਿ ਜੇ ਉਸ ਨੇ ਹਰਮੁਜ ਪਾਣੀ ਸੰਧੀ ਬੰਦ ਕੀਤੀ ਜਾਂ ਪ੍ਰਮਾਣੂ ਹਥਿਆਰ ਬਣਾਇਆ ਤਾਂ ਉਸ ਵਿਰੁੱਧ ਕਾਰਵਾਈ ਦੇ ਸਭ ਬਦਲ ਖੁੱਲ੍ਹੇ ਹਨ।

ਕਿੰਗਫਿਸ਼ਰ ਏਅਰਲਾਈਨਜ਼ ਦੀਆਂ ਉਡਾਣਾਂ ਰੱਦ- ਡੀ ਜੀ ਸੀ ਏ ਵਲੋਂ ਸਖਤੀ ਕਰਨ ਦੇ ਸੰਕੇਤ

editor — Mon, 20 Feb 2012 09:49:27 +0000

ਨਵੀਂ ਦਿੱਲੀ, 20 ਫਰਵਰੀ (ਰੋਡ ਨਿਊਜ਼ ਬਿਊਰੋ)- ਵਿੱਤੀ ਸੰਕਟ ਨਾਲ ਜੂਝ ਰਹੀ ਕਿੰਗਫਿਸ਼ਰ ਏਅਰਲਾਈਨਜ਼ ਦੀਆਂ ਕਈ ਉਡਾਣਾਂ ਅੱਜ ਦੂਜੇ ਦਿਨ ਵੀ ਰੱਦ ਹੋ ਗਈਆਂ। ਕੰਪਨੀ ਨੇ ਕਿਹਾ ਹੈ ਕਿ ਇਹ ਸਥਿਤੀ ਚਾਰ ਦਿਨਾਂ ਤੱਕ ਜਾਰੀ ਰਹੇਗੀ। ਕੰਪਨੀ ਦੀਆਂ ਕੁੱਲ 240 ਉਡਾਣਾਂ ਵਿੱਚੋਂ 160-180 ਹੀ ਉਡਾਣ ਭਰ ਰਹੀਆਂ ਹਨ। ਇਸ ਵੇਲੇ ਏਅਰ ਇੰਡੀਆ ਤੇ ਕਿੰਗਫਿਸ਼ਰ ਵੱਡੇ ਵਿੱਤੀ ਸੰਕਟ ਵਿੱਚੋਂ ਲੰਘ ਰਹੀਆਂ ਹਨ ਤੇ ਸਰਕਾਰ ਵਲੋਂ ਮੰਦੇ ਦੀ ਸ਼ਿਕਾਰ ਇਸ ਹਵਾਈ ਸਨਅਤ ਨੂੰ ਹੁਲਾਰਾ ਦੇਣ ਲਈ ਵਿੱਤੀ ਪੈਕੇਜ ਦੇਣ ਦੀ ਨੀਤੀ ਉਪਰ ਵਿਚਾਰ ਕੀਤਾ ਜਾ ਰਿਹਾ ਹੈ।
ਸੂਤਰਾਂ ਅਨੁਸਾਰ ਇਸ ਪੈਕੇਜ ਨੂੰ ਤਿਆਰ ਕਰਨ ਤੋਂ ਪਹਿਲਾਂ ਸ਼ਹਿਰੀ ਹਵਾਬਾਜ਼ੀ ਮੰਤਰਾਲੇ ਵਲੋਂ ਸਾਰੀਆਂ ਹਵਾਈ ਕੰਪਨੀਆਂ ਨੂੰ ਆਪਣੀ ਮੌਜੂਦਾ ਵਿੱਤੀ ਸਥਿਤੀ ਬਾਰੇ ਰਿਪੋਰਟ ਦੇਣ ਲਈ ਕਿਹਾ ਸੀ। ਮੰਤਰਾਲੇ ਨੇ ਮੁਨਾਫੇ ਵਿੱਚ ਜਾ ਰਹੀ ਇੰਡੀਗੋ ਏਅਰਲਾਈਨ ਤੋਂ ਵੀ ਰਿਪੋਰਟ ਮੰਗੀ ਸੀ। ਏਅਰ ਇੰਡੀਆ ਸਣੇ 7 ਹਵਾਈ ਕੰਪਨੀਆਂ ਨੇ ਆਪਣੀ ਰਿਪੋਰਟ ਦੇ ਦਿੱਤੀ ਹੈ। ਸਰਕਾਰ ਨੇ ਇਸ ਬਾਰੇ ਇੱਕ ਕਾਰਜਕਾਰੀ ਗਰੁੱਪ ਬਣਾਇਆ ਹੈ। ਇਸ ਦੇ ਚੇਅਰਮੈਨ ਸ਼ਹਿਰੀ ਹਵਾਬਾਜ਼ੀ ਸਕੱਤਰ ਨਸੀਮ ਜ਼ੈਦੀ ਹਨ। ਇਹ ਕਮੇਟੀ ਪ੍ਰਾਪਤ ਰਿਪੋਰਟਾਂ ਤੇ ਹਵਾਈ ਕੰਪਨੀਆਂ ਦੀਆਂ ਸਮੱਸਿਆਵਾਂ ਦੀ ਘੋਖ ਕਰੇਗੀ। ਇੰਡੀਗੋ ਤੋਂ ਇਲਾਵਾ ਜਿਨ੍ਹਾਂ ਹੋਰਨਾਂ ਨੇ ਰਿਪੋਰਟ ਜਮ੍ਹਾ ਕਰਵਾਈ ਹੈ, ਉਨ੍ਹਾਂ ਵਿੱਚ ਏਅਰ ਇੰਡੀਆ, ਜੈਟ ਏਅਰਵੇਜ਼, ਜੈਟ ਲਾਈਟ, ਕਿੰਗਫਿਸ਼ਰ, ਸਪਾਈਸ ਜੈਟ ਤੇ ਗੋਏਅਰ ਸ਼ਾਮਲ ਹਨ।
ਕਿੰਗਫਿਸ਼ਰ ਵਲੋਂ ਉਡਾਣ ਰੱਦ ਕਰਨ ਦੇ ਮੱਦੇਨਜ਼ਰ ਡੀ ਸੀ ਸੀ ਏ ਨੇ ਉਸ ਦੇ ਖਿਲਾਫ ਕਾਰਵਾਈ ਕਰਨ ਦੀ ਤਿਆਰੀ ਸ਼ੁਰੂ ਕਰ ਦਿੱਤੀ ਹੈ। ਕੰਪਨੀ ਵਲੋਂ ਘਰੇਲੂ ਤੇ ਵਿਦੇਸ਼ੀ ਉਡਾਣਾਂ ਵੱਡੇ ਪੱਧਰ ‘ਤੇ ਰੱਦ ਕੀਤੀਆਂ ਜਾ ਰਹੀਆਂ ਹਨ। ਡੀ ਜੀ ਸੀ ਏ ਦੇ ਮੁਖੀ ਏ ਕੇ ਭਾਰਤ ਭੂਸ਼ਣ ਨੇ ਕਿਹਾ, ‘ਕੰਪਨੀ ਨੂੰ ਕੋਈ ਵੀ ਉਡਾਣ ਰੱਦ ਕਰਨ ਤੋਂ ਪਹਿਲਾਂ ਸਾਨੂੰ ਦੱਸਣਾ ਜ਼ਰੂਰੀ ਹੈ, ਪਰ ਉਸ ਵਲੋਂ ਅਜਿਹਾ ਨਹੀਂ ਕੀਤਾ ਜਾ ਰਿਹਾ।’

ਇਟਲੀ ਦੇ ਸਮੁੰਦਰੀ ਜਹਾਜ਼ ਦੇ ਦੋ ਅਫਸਰ ਭਾਰਤ ਦੀ ਪੁਲਸ ਵੱਲੋਂ ਗ੍ਰਿਫਤਾਰ- ਮਛੇਰਿਆਂ ਦੀ ਹੱਤਿਆ ਦੇ ਮਾਮਲੇ ‘ਚ ਭਾਰਤ ਦਾ ਸਖਤ ਰੁਖ਼

editor — Mon, 20 Feb 2012 09:47:44 +0000

ਕੋਚੀ, 20 ਫਰਵਰੀ (ਰੋਡ ਨਿਊਜ਼ ਬਿਊਰੋ)- ਚਾਰ ਦਿਨ ਦੀ ਗੱਲਬਾਤ ਮਗਰੋਂ ਇਟਲੀ ਦੇ ਕਾਰੋਬਾਰੀ ਜਹਾਜ਼ ਦੇ ਦੋ ਸੁਰੱਖਆ ਗਾਰਡਾਂ ਨੂੰ ਕੋਚੀ (ਕੇਰਲਾ) ਵਿੱਚ ਅੱਜ ਹਿਰਾਸਤ ‘ਚ ਲੈ ਲਿਆ ਗਿਆ। ਉਨ੍ਹਾਂ ‘ਤੇ ਕੇਰਲਾ ਦੇ ਤੱਟ ਵਾਲੇ ਪਾਸੇ ਇੱਕ ਕਿਸ਼ਤੀ ‘ਤੇ ਫਾਇਰਿੰਗ ਕਰ ਕੇ ਦੋ ਭਾਰਤੀ ਮਛੇਰਿਆਂ ਦੀ ਹੱਤਿਆ ਕਰਨ ਦਾ ਦੋਸ਼ ਹੈ।
ਇਸੇ ਦੌਰਾਨ ਦੂਤ ਪੱਧਰ ‘ਤੇ ਚੱਲ ਰਹੀ ਗੱਲ ਦੇ ਸੰਬੰਧ ਵਿੱਚ ਭਾਰਤ ਨੇ ਆਸ ਪ੍ਰਗਟਾਈ ਕਿ ਇਟਲੀ ਇਹ ਯਕੀਨੀ ਬਣਾਉਣ ‘ਚ ਸਹਿਯੋਗ ਦੇਵੇਗਾ ਕਿ ਇਸ ਮਾਮਲੇ ‘ਚ ਭਾਰਤ ਦਾ ਕਾਨੂੰਨ ਆਪਣਾ ਰਸਤਾ ਅਖਤਿਆਰ ਕਰ ਸਕੇ। ਇਸ ਤੋਂ ਪਹਿਲਾਂ ਇਟਲੀ ਦੇ ਕਾਨੂੰਨ ਤੇ ਵਿਦੇਸ਼ ਮੰਤਰਾਲਿਆਂ ਦੇ ਅਧਿਕਾਰੀਆਂ ਦੀ ਟੀਮ ਨੇ ਨਵੀਂ ਦਿੱਲੀ ‘ਚ ਭਾਰਤ ਦੇ ਵਿਦੇਸ਼ ਮੰਤਰਾਲੇ ਦੇ ਸੀਨੀਅਰ ਅਧਿਕਾਰੀਆਂ ਨਾਲ ਮੀਟਿੰਗ ਕੀਤੀ। ਮੀਟਿੰਗ ਵਿੱਚ ਦੋਵੇਂ ਧਿਰਾਂ ਇਸ ਗੱਲ ਲਈ ਸਹਿਮਤ ਹੋਈਆਂ ਕਿ ਕੋਈ ਵੀ ਹਥਿਆਰਬੰਦ ਅਮਲਾ ਨਿਹੱਥੇ ਮਛੇਰਿਆਂ ‘ਤੇ ਫਾਇਰਿੰਗ ਨਹੀਂ ਕਰ ਸਕਦਾ।
ਲਾਟੋਰ ਮੈਸੀਮਿਲਿਆਨੇ ਅਤੇ ਸੇਲਵਾਟੋਰ ਗਿਹੋਨ ਦੋਵੇਂ ਜਣੇ ਇਟਲੀ ਦੇ ਵਪਾਰਕ ਸਮੁੰਦਰੀ ਜਹਾਜ਼ ‘ਐਨਰਿਕਾ ਲੈਕਸਾਈ’ ਉੱਤੇ ਤਾਇਨਾਤ ਇਟਾਲੀਅਨ ਨੇਵੀ ਦੇ ਛੇ ਮੈਂਬਰੀ ਸੁਰੱਖਿਆ ਅਮਲੇ ਵਿੱਚ ਸ਼ਾਮਲ ਸਨ। ਇਨ੍ਹਾਂ ਨੂੰ ਅੱਜ ਸ਼ਾਮੀਂ ਕੋਚੀ ਕੰਢੇ ‘ਤੇ ਲਿਆਂਦਾ ਗਿਆ। ਬੀਤੀ ਰਾਤ ਪੁਲਸ ਵਲੋਂ ਮਿੱਥੀ ਗਈ ਸਮਾਂ ਸੀਮਾ ਤੋਂ ਅੱਠ ਘੰਟੇ ਪਿੱਛੋਂ ਹੀ ਅਜਿਹਾ ਸੰਭਵ ਹੋ ਸਕਿਆ। ਇਸ ਘਟਨਾ ਬਾਰੇ ਕੋਲਾਮ ਥਾਣੇ ‘ਚ ਕਤਲ ਦਾ ਕੇਸ ਦਰਜ ਕੀਤਾ ਗਿਆ ਸੀ। ਪੁਲਸ ਵਲੋਂ ਜਦੋਂ ਇਹ ਸਪੱਸ਼ਟ ਕਰ ਦਿੱਤਾ ਗਿਆ ਕਿ ਜਹਾਜ਼ ਦੇ ਅਮਲੇ ਨੂੰ ਉਨ੍ਹਾਂ ਦੇ ਸਪੁਰਦ ਕਰ ਦਿਤਾ ਜਾਵੇ ਤਾਂ ਜਹਾਜ਼ ਦੇ ਅਧਿਕਾਰੀ ਅੱਜ ਦੋ ਸੁਰੱਖਿਆ ਗਾਰਡਾਂ ਨੂੰ ਪੁਲਸ ਨੂੰ ਸੌਂਪਣ ਲਈ ਮੰਨ ਗਏ, ਪਰ ਇਹ ਹਵਾਲਗੀ ਪਛੜਦੀ ਰਹੀ ਤੇ ਸ਼ਾਮੀਂ 4 ਵਜੇ ਦੋ ਇਤਾਲਵੀ ਸੈਨਿਕਾਂ ਨੂੰ ਕੰਢੇ ਲਿਆਂਦਾ ਜਾ ਸਕਿਆ।
ਕੋਚੀ ਵਿੱਚ ਪੁਲਸ ਸੂਤਰਾਂ ਨੇ ਦੱਸਿਆ ਕਿ ਵਿਸਥਾਰ ਪੂਰਵਕ ਪੁੱਛ-ਪੜਤਾਲ ਲਈ ਦੋਵਾਂ ਨੂੰ ਵੈਲਿੰਗਟਨ ਟਾਪੂ ਨੇੜੇ ਪੈਂਦੇ ਸੀ ਆਈ ਐਸ ਐਫ ਗੈਸਟ ਹਾਊਸ ‘ਚ ਲਿਜਾਇਆ ਗਿਆ ਹੈ। ਏਰਨਾਕੁਲਮ ਰੇਂਜ ਦੇ ਆਈ ਜੀ, ਕੇ ਪਦਮਾ ਕੁਮਾਰ, ਕੋਚੀ ਦੇ ਪੁਲਸ ਕਮਿਸ਼ਨਰ ਐਮ ਆਰ ਅਜੀਤ ਕੁਮਾਰ, ਕੋਲਾਮ ਦੇ ਐਸ ਪੀ ਸੈਮ ਕ੍ਰਿਸਟੀ ਡੇਨੀਅਲ ਅਤੇ ਅਸਿਸਟੈਂਟ ਕਮਿਸ਼ਨਰ (ਵਿਸ਼ੇਸ਼ ਸ਼ਾਖਾ) ਐਮ ਐਨ ਰਾਮੇਸ਼ ਜਿਹੇ ਸੀਨੀਅਰ ਪੁਲਸ ਅਧਿਕਾਰੀਆਂ ਦੀ ਅਗਵਾਈ ਵਿੱਚ ਦੋਵੇਂ ਇਤਾਲਵੀਆਂ ਨੂੰ ਕੰਢੇ ‘ਤੇ ਲਿਆਂਦਾ ਗਿਆ।
ਮੁੰਬਈ ਵਿੱਚ ਇਟਲੀ ਦੇ ਕੌਂਸਲ ਜਨਰਲ ਜਿਆਨ ਪਾਓਲੋ ਕੁਟਿਲੋ ਤੇ ਰੱਖਿਆ ਅਟੈਚੀ ਫਰੈਂਕੋ ਫਾਵਰੇ ਵੀ ਪੁਲਸ ਟੀਮ ਦੇ ਨਾਲ ਸਨ। ਪਦਮਾ ਕੁਮਾਰ ਨੇ ਦੱਸਿਆ ਕਿ ਪੁਲਸ ਨੇ ਜਹਾਜ਼ ਵਿੱਚ ਦਸਤਾਵੇਜ਼ਾਂ ਦੀ ਪੁਣਛਾਣ ਕੀਤੀ ਤੇ ਇਸ ਵਿਚਲੇ 20 ਮੈਂਬਰੀ ਅਮਲੇ ਤੇ ਕਪਤਾਨ ਦੇ ਬਿਆਨ ਦਰਜ ਕੀਤੇ। ਦੋ ਭਾਰਤੀ ਮਛੇਰਿਆਂ ਦੀ ਕਿਸ਼ਤੀ ‘ਤੇ 15 ਫਰਵਰੀ ਨੂੰ ਕੋਲਾਮ ਤੱਟ ਨੇੜੇ ਇਤਾਲਵੀ ਜਹਾਜ਼ ਦੇ ਗਾਰਡਾਂ ਨੇ ਫਾਇਰਿੰਗ ਕਰ ਕੇ ਉਨ੍ਹਾਂ ਦੋਵਾਂ ਨੂੰ ਮਾਰ ਦਿੱਤਾ ਸੀ।

ਬਾਲੀਵੁੱਡ ਫਿਲਮ ‘ਤੇਰੇ ਨਾਲ ਲਵ ਹੋ ਗਿਆ’ ਆਸਟਰੇਲੀਆ ‘ਚ 23 ਫਰਵਰੀ ਨੂੰ ਰੀਲੀਜ

editor — Sat, 18 Feb 2012 07:10:58 +0000

ਮੈਲਬੋਰਨ ,18 ਫਰਵਰੀ (ਰੋਡ ਨਿਊਜ਼ ਬਿਊਰੋ)- ਯੂ ਟੀ ਵੀ ਮੌਸ਼ਨ ਪਿਕਚਰਜ ਤੇ ਟਿਪਸ ਵੱਲੋਂ ਬਣਾਈ ਗਈ ਬਾਲੀਵੁੱਡ ਫਿਲਮ ‘ਤੇਰੇ ਨਾਲ ਲਵ ਹੋ ਗਿਆ’ ਨੂੰ ਆਸਟ੍ਰੇਲੀਆ ਵਿਚ ਸਿੱਪੀ ਗਰੇਵਾਲ ਦੀ ਡਰੀਮਵਰਲਡ ਐਂਟਰਟੇਨਮੈਂਟ, ਸੱਤੀ ਗਰੇਵਾਲ ਦੀ ਵਿਸਲਿੰਗ ਵੁਡਜ਼ ਤੇ ਸੁੱਖਾ ਪ੍ਰੋਡਕਸ਼ਨਜ ਵੱਲੋਂ ਫਰਵਰੀ ਨੂੰ ਰੀਲੀਜ ਕੀਤਾ ਜਾ ਰਿਹਾ ਹੈ। ਇਸ ਫਿਲਮ ਬਾਰੇ ਹੋਰ ਜਾਣਕਾਰੀ ਦਿੰਦੇ ਹੋਏ ਸ਼ਿੰਕੂ ਨਾਭਾ ਤੇ ਦਿਲਪ੍ਰੀਤ ਸਿੱਧੂ ਨੇ ਦੱਸਿਆ ਕਿ ਇਸ ਫਿਲਮ ਦੀ ਸ਼ੂਟਿੰਗ ਪੰਜਾਬ ਦੇ ਕਾਫੀ ਹਿੱਸਿਆਂ ‘ਚ ਕੀਤੀ ਗਈ ਹੈ। ਇਹ ਮਨੋਰੰਜਨ ਭਰਪੂਰ ਫਿਲਮ ਹੈ ਤੇ ਇਸ ਫਿਲਮ ਨੂੰ ਪੂਰੇ ਆਸਟ੍ਰੇਲੀਆ ਦੇ 13 ਸਿਨੇਮਾਘਰਾਂ ‘ਚ 14 ਪ੍ਰਿੰਟਾਂ ਨਾਲ ਪ੍ਰਦਰਸ਼ਿਤ ਕੀਤਾ ਜਾਵੇਗਾ। ਇਸ ਫਿਲਮ ਦੇ ਵਿਚ ਮੁੱਖ ਕਲਾਕਾਰਾਂ ‘ਚ ਰਿਤੇਸ਼ ਦੇਸ਼ਮੁਖ, ਜੇਨੇਲੀਆ ਡਿਸੂਜਾ ਤੇ ਓਮ ਪੁਰੀ ਹਨ। ਇਸ ਫਿਲਮ ਦੇ ਡਾਇਰੈਕਟਰ ਮਨਦੀਪ ਕੁਮਾਰ ਹਨ ਜੋ ਕਿ ਪਹਿਲਾਂ ਸੁਪਰ ਹਿੱਟ ਪੰਜਾਬੀ ਫਿਲਮ ‘ਜਿਹਨੇ ਮੇਰਾ ਦਿਲ ਲੁੱਟਿਆ’ ਨੂੰ ਨਿਰਦੇਸ਼ਤ ਕਰ ਚੁੱਕੇ ਹਨ।